რეალურ სექტორთან დაკავშირებით, 2016 წლის I ნახევარში, წინასწარი შეფასებით, რეალური მთლიანი შიდა პროდუქტი (მშპ) 2.9%-ით გაიზარდა წინა წლის ანალოგიურ პერიოდთან შედარებით. მათ შორის, I კვარტალში 2.6%-ით, ხოლო II კვარტალში 3.1%-ით. 2016 წლის პირველი  ნახევრის ბოლოს - ივნისში წლიურმა ინფლაციამ 1.1% შეადგინა, რაც მნიშვნელოვნად ნაკლებია ეროვნული ბანკის მიერ გამოცხადებულ მიზნობრივ მაჩვენებელთან (5%) შედარებით.

ფისკალური სექტორთან მიმართებაში, 2016 წლის I ნახევარში ნაერთი ბიუჯეტის შემოსავლები 6.9%-ით გაიზარდა გასული წლის ანალოგიურ პერიოდთან შედარებით, ხოლო ხარჯებმა და არაფინანსური აქტივების შეძენამ 11.7%-ით მოიმატა. 2016 წლის II კვარტალის მდგომარეობით, სახელმწიფო ვალი 7.9%-ით გაიზარდა გასული წლის ამავე პერიოდთან შედარებით. კერძოდ, სახელმწიფო საშინაო ვალი გაიზარდა 1.9%-ით, ხოლო სახელმწიფო საგარეო ვალი 9.8%-ით, რაც ძირითადად ვალუტის კურსის ცვლილებას უკავშირდება.

საგარეო სექტორის დინამიკასთან დაკავშირებით, 2016 წლის I ნახევარში საქონლით საგარეო სავაჭრო ბრუნვა 20%-ით მეტია გასული წლის ანალოგიურ პერიოდის მაჩვენებელზე. კერძოდ,  ექსპორტი 12%-ით შემცირდა, ხოლო იმპორტი მკვეთრად - 30%-ით გაიზარდა (მნიშვნელოვანწილად, გრანტის ფარგლებში C ჰეპატიტის სამკურნალო საშუალებების მოწოდების ხარჯზე). 2016 წლის II კვარტალის მდგომარეობით, მთლიანი საერთაშორისო  რეზერვები 15%-ით გაიზარდა 2015 წლის ანალოგიურ პერიოდთან შედარებით და 2,857 მლნ აშშ დოლარი შეადგინა. 2016 წლის II კვარტალში ლარის კურსი აშშ დოლარის მიმართ, წინა კვარტალთან შედარებით 10.1%-ით, ხოლო 2015 წლის II კვარტალთან მიმართებით 3.1%-ით გამყარდა.  

მონეტარულ სექტორთან მიმართებაში, 2016 წლის II კვარტალში, წინა კვარტალთან შედარებით, საბაზრო საპროცენტო განაკვეთები სესხებზე 1.4%-ული პუნქტით შემცირდა და 14.5%-ს გაუტოლდა. წინა წლის ანალოგიურ პერიოდთან შედარებით, 2016 წლის II კვარტალში კომერციული ბანკების მიერ გაცემული სესხები 10.9%-ით გაიზარდა. 2016 წლის II კვარტალის ბოლოს აშშ დოლარში გამოსახულმა ანაბრებმა მთლიანი ანაბრების 64.2% შეადგინა.

სოციალური და შრომის ბაზრის ინდიკატორებიდან, 2015 წელს, წინა წელთან შედარებით, უმუშევრობის დონე 0.4%-ული პუნქტით შემცირდა და 12.0% შეადგინა. 2016 წლის II კვარტალში, წინა წლის იმავე კვარტალთან შედარებით, განათლებასა და ჯანდაცვაზე გაწეული ხარჯები მნიშვნელოვნად გაიზარდა (შესაბამისად, 22%-ით და 14 %-ით).