ანგარიშგების პოლიტიკა
საქართველოს პარლამენტის საბიუჯეტო ოფისის ანგარიშგების პოლიტიკა სახელმწიფო ბიუჯეტის დაგეგმვისა და შესრულების ეტაპებზე ეყრდნობა მის, როგორც დამოუკიდებელი ფისკალური ინსტიტუციის როლს და საქართველოს პარლამენტის რეგლამენტით (ასევე საქართველოს საბიუჯეტო კოდექსის გათვალისწინებით) საბიუჯეტო პროცესის ფარგლებში პარლამენტის საბიუჯეტო ოფისისათვის განსაზღვრულ ვალდებულებებს.
სახელმწიფო ბიუჯეტის დაგეგმვის ეტაპზე
საქართველოს პარლამენტის რეგლამენტის 136-138-ე მუხლების შესაბამისად, საქართველოს პარლამენტის საბიუჯეტო ოფისი ამზადებს საშუალოვადიანი პერიოდისათვის ქვეყნის ძირითადი მონაცემებისა და მიმართულებების დოკუმენტისა და დასაგეგმი წლის სახელმწიფო ბიუჯეტის კანონის პროექტის მიმოხილვას (თავდაპირველი ვარიანტი, გადამუშავებული ვარიანტი, საბოლოო ვარიანტი). მიმოხილვები მიზნად ისახავს წარმოადგინოს სახელმწიფო ბიუჯეტის პროექტის ანალიზი სხვადასხვა მაჩვენებლების მიხედვით და ასევე პარლამენტის საბიუჯეტო ოფისის მიერ მომზადებული მაკრო-ფისკალური პროგნოზები.
მიმოხილვები მზადდება შემდეგ ვადებში:
- სახელმწიფო ბიუჯეტის პროექტის პირველი წარდგენისას (არაუგვიანეს 1 ოქტომბრისა) - პარლამენტის მიერ ზემოაღნიშნული დოკუმენტების ვებგვერდზე გამოქვეყნებიდან 2 კვირის ვადაში;
- სახელმწიფო ბიუჯეტის პროექტის გადამუშავებული ვარიანტის წარდგენისას (არაუგვიანეს 5 ნოემბრისა) - სახელმწიფო ბიუჯეტის კანონის პროექტისა და ქვეყნის ძირითადი მონაცემებისა და მიმართულებების დოკუმენტის გადამუშავებულ ვარიანტების საბიუჯეტო ოფისისათვის გადაცემიდან 3 დღის ვადაში;
- სახელმწიფო ბიუჯეტის პროექტის საბოლოო ვარიანტის წარდგენისას(არაუგვიანეს 30 ნოემბრისა) - პარლამენტის მიერ განხილვის განრიგის გათვალისწინებით.
ამავდროულად, პარლამენტის რეგლამენტის 139-ე მუხლის შესაბამისად, პარლამენტის საბიუჯეტო ოფისი ამზადებს სახელმწიფო ბიუჯეტის კანონში ცვლილების შეტანის შესახებ კანონის პროექტის მიმოხილვას, მიმოხილვის პარლამენტისათვის წარდგენის ვადები განისაზღვრება პარლამენტის თავმჯდომარის მიერ სახელმწიფო ბიუჯეტის კანონში ცვლილების შეტანის შესახებ კანონის პროექტის განხილვის გრაფიკის შესაბამისად.
სახელმწიფო ბიუჯეტის შესრულების ეტაპზე
პარლამენტის საბიუჯეტო ოფისი ამზადებს:
- სახელმწიფო ბიუჯეტის შესრულების მიმდინარეობის მოკლე ყოველთვიურ მიმოხილვას, რომელიც მზადდება სახელმწიფო ხაზინის მიერ საბიუჯეტო ოფისისთვის მიწოდებული ოპერატიული ინფორმაციის საფუძველზე და მიზნად ისახავს წარმოადგინოს დროული და ზოგადი ინფორმაცია სახელმწიფო ბიუჯეტის შესრულების შესახებ. მიმოხილვის მომზადება ხდება ინფორმაციის მიღებიდან (თვის დასრულებიდან 1 სამუშაო დღის ვადა) საშუალოდ, ორ სამუშაო დღეში.
- სახელმწიფო ბიუჯეტის შესრულების მიმდინარეობის ყოველთვიურ მიმოხილვას, სახელმწიფო ხაზინის მიერ საქართველოს საბიუჯეტო კოდექსის 53-ე მუხლის შესაბამისად, საქართველოს პარლამენტისათვის წარდგენილ ინფორმაციაზე დაყრდნობით. ყოველთვიური მიმოხილვა მიზნად ისახავს წარმოადგინოს მხოლოდ ძირითადი ინფორმაცია სახელმწიფო ბიუჯეტის შესრულების შესახებ. მიმოხილვის მომზადება ხდება შესაბამისი ინფორმაციის მიღებიდან (თვის დასრულებიდან 20 დღის ვადა) საშუალოდ, ოთხ სამუშაო დღეში.
- სახელმწიფო ბიუჯეტის 3, 6 და 9 თვის შესრულების მიმოხილვას, საქართველოს საბიუჯეტო კოდექსის 54-ე მუხლის შესაბამისად, საქართველოს ფინანსთა სამინისტროს მიერ საქართველოს პარლამენტისათვის წარდგენილი სახელმწიფო ბიუჯეტის შესრულების კვარტალური მიმოხილვის (ნაზარდი ჯამით) გათვალისწინებით. მიმოხილვა მიზნად ისახავს წარმოადგინოს სახელმწიფო ბიუჯეტის 3, 6 და 9 თვის შესრულების ანალიზი. მიმოხილვის მომზადება ხდება შესაბამისი ინფორმაციის მიღებიდან (კვარტლის დასრულებიდან 1 თვის ვადა) საშუალოდ, რვა სამუშაო დღეში, თუმცა ვადები შესაძლებელია დაკორექტირდეს საქართველოს ფინანსთა სამინისტროს მიერ წარდგენილი ანგარიშის საკომიტეტო განხილვების განრიგის შესაბამისად.
- საქართველოს პარლამენტის რეგლამენტის 142-ე მუხლის შესაბამისად, სახელმწიფო ბიუჯეტის შესრულების წლიურ მიმოხილვას. მიმოხილვა მიზნად ისახავს წარმოადგინოს საანგარიშგებო პერიოდისათვის სახელმწიფო ბიუჯეტის შესრულების ძირითადი ტენდენციები და შესრულების მაჩვენებლების საქართველოში არსებულ ფისკალურ წესებთან შესაბამისობა. მიმოხილვის პარლამენტისათვის წარდგენა ხდება პარლამენტის საბიუჯეტო ოფისის მიერ სახელმწიფო ბიუჯეტის შესრულების წლიური ანგარიშის მიღებიდან 2 კვირის ვადაში.
ავტონომიური რესპუბლიკების რესპუბლიკური ბიუჯეტებისა და ადგილობრივი თვითმმართველი ერთეულების ბიუჯეტების მიმოხილვა
ფისკალური გარემოს ანალიზისა და ფისკალური მდგრადობის კუთხით ავტონომიური რესპუბლიკებისა და ადგილობრივი თვითმმართველი ერთეულების ფინანსების განსაკუთრებული მნიშვნელობიდან გამომდინარე, პარლამენტის საბიუჯეტო ოფისი ამზადებს ავტონომიური რესპუბლიკების რესპუბლიკური ბიუჯეტებისა და ადგილობრივი თვითმმართველი ერთეულების ბიუჯეტების შესრულების წლიურ მიმოხილვას. მიმოხილვა მიზნად ისახავს წარმოადგინოს ძირითადი ტენდენციები აგრეგირებულად ავტონომიური რესპუბლიკებისა და ადგილობრივი თვითმმართველობის ფინანსებისათვის, ასევე თითოეული ავტონომიური რესპუბლიკისა და თვითმმართველი ერთეულის დონეზე ძირითადი ფისკალური ინდიკატორების დინამიკა.
დეტალური ინფორმაციისათვის პარლამენტის საბიუჯეტო ოფისის ანგარიშების გამოქვეყნების ვადების შესახებ იხ. ბიუჯეტის ანალიზის ანგარიშგების კალენდარი 2025 წლისათვის.
