პარლამენტის საბიუჯეტო ოფისის ხელმძღვანელი ანდრია გვიდიანი და ოფისის თანამშრომლები საქართველოში ვიზიტად მყოფი ტაჯიკეთის სამთავრობო დელეგაციის წევრებს შეხვდნენ.

შეხვედრაზე საუბარი ძირითადად დაეთმო საქართველოს ფინანსურ სისტემას და ამ სფეროში მიმდინარე რეფორმებს, პარლამენტის საბიუჯეტო ოფისის საქმიანობას და როლს ბიუჯეტის ფორმირების პროცესში, ბიუჯეტის სახსრების გამჭვირვალობის საკითხს და სხვა.

„ტაჯიკეთის მხარე დაინტერესებულია იმ რეფორმებით, რომლებსაც საქართველო ბოლო წლების განმავლობაში ახორციელებს და, შესაბამისად, ჩვენი გამოცდილება მათთვის საინტერესოა. საუბარი შეეხო იმ წარმატებულ რეფორმებს, რომლებსაც საქართველო ახორციელებს როგორც ბიუჯეტის გამჭვირვალობის, ასევე საჯარო ფინანსების მართვის მიმართულებით. დელეგაციის წევრები დაინტერესდნენ საქართველოს ფინანსური სისტემით, საჯარო ფინანსებზე საპარლამენტო ზედამხედველობით, ასევე პარლამენტის საბიუჯეტო ოფისის როლით საპარლამენტო ზედამხედველობაში და, ზოგადად, ბიუჯეტის პროექტის განხილვებში. მათ ასევე გვთხოვეს რეფორმების იმპლემენტაციის პროცესში ტექნიკური და საკონსულტაციო მხარდაჭერა, რისთვისაც ჩვენი მხრიდან მზადყოფნა გამოვხატეთ", - განაცხადა პარლამენტის საბიუჯეტო ოფისის უფროსმა ანდრია გვიდიანმა.

ტაჯიკეთის სამთავრობო დელეგაციის შემადგენლობაში არიან პარლამენტის, პრეზიდენტის ოფისის, ფინანსთა სამინისტროს და დარგობრივი სამინისტროების საფინანსო სამსახურების ხელმძღვანელები.

გალერეა