• რეალურ სექტორთან დაკავშირებით, 2018 წლის III კვარტალში, წინასწარი შეფასებით, მთლიანი შიდა პროდუქტის (მშპ) საშუალო რეალურმა ზრდამ 4.0% შეადგინა. 2018 წლის III კვარტალში წლიური ინფლაციის საშუალო მაჩვენებელი 2.9%-ით განისაზღვრა, რაც მცირედით ნაკლებია ეროვნული ბანკის მიერ გამოცხადებულ მიზნობრივ მონაცემთან (3%) შედარებით.

• ფისკალურ სექტორთან მიმართებაში, 2018 წლის III კვარტალში ნაერთი ბიუჯეტის შემოსავლები 8.8%-ით გაიზარდა გასული წლის ანალოგიურ პერიოდთან შედარებით, ხოლო ხარჯები და არაფინანსური აქტივების შეძენა 1.9%-ით შემცირდა.

• საგარეო სექტორის დინამიკასთან დაკავშირებით, 2018 წლის III კვარტალში საქონლით საგარეო სავაჭრო ბრუნვა 14%-ით მეტია გასული წლის ანალოგიურ პერიოდის მაჩვენებელზე. კერძოდ, ექსპორტი 21%-ით, იმპორტი კი 12%-ით გაიზარდა. 2016 წლის IV კვარტალიდან აღინიშნება პოზიტიური ტენდენცია - ექსპორტის ზრდის ტემპი კვლავ დადებითია და 2018 წლის III კვარტალში, წინა წლების შესაბამის პერიოდებთან შედარებით, ექსპორტის ყველაზე მაღალი მაჩვენებელი დაფიქსირდა. 2018 წლის III კვარტალის მდგომარეობით, მთლიანი საერთაშორისო რეზერვები 4.2%-ით გაიზარდა 2017 წლის ანალოგიურ პერიოდთან შედარებით და ისტორიულ მაქსიმუმს - 3,153 მლნ აშშ დოლარს მიაღწია. 2018 წლის III კვარტალში ლარის კურსი აშშ დოლარის მიმართ, წინა კვარტალთან შედარებით 3.3%-ით, ხოლო 2017 წლის III კვარტალთან მიმართებით 4.3%-ით გაუფასურდა.

• მონეტარულ სექტორთან მიმართებაში, 2018 წლის III კვარტალში, წინა კვარტალთან შედარებით, საბაზრო საპროცენტო განაკვეთები სესხებზე 0.7%-ული პუნქტით შემცირდა და 11.9%-ს გაუტოლდა. წინა წლის ანალოგიურ პერიოდთან შედარებით, 2018 წლის III კვარტალში კომერციული ბანკების მიერ გაცემული სესხები 22.8%-ით გაიზარდა. 2018 წლის III კვარტალის ბოლოს აშშ დოლარში გამოსახულმა ანაბრებმა მთლიანი ანაბრების 63.1% შეადგინა.

• სოციალური და შრომის ბაზრის ინდიკატორებიდან, 2018 წლის II კვარტალში, წინა წლის შესაბამის პერიოდთან შედარებით, ბიზნეს სექტორში დასაქმებულების რაოდენობა 25.2 ათასი კაცით გაიზარდა და 656.5 ათასი კაცი შეადგინა. 2018 წლის III კვარტალში განათლებაზე გაწეული ხარჯები 260 მლნ ლარს, ხოლო ჯანდაცვაზე - 268 მლნ ლარს შეადგენს.