2016 წლის ბიუჯეტის კანონით შემოსულობების და გადასახდელების წლიური გეგმა განისაზღვრა 10,145 მლნ ლარის დონეზე. რაც შეეხება შესრულებას, 2016 წლის 11 თვის მდგომარეობით, სახელმწიფო ბიუჯეტის შემოსულობები წლიური გეგმის 87%-ს შეადგენს და გასული წლის მაჩვენებელს 1%-ით (48 მლნ ლარით)  აღემატება, ხოლო გადასახდელების მაჩვენებელი წლიური გეგმის 89%-ს შეადგენს და გასული წლის მაჩვენებელს 7%-ით (557 მლნ ლარით) აღემატება.

შემოსულობების კომპონენტების დონეზე, შედარებით დაბალი შესრულების მაჩვენებელი ფინანსური აქტივების  კლების და ვალდებულებების ზრდის მუხლით შემოსულობებისათვის ვლინდება (წლიური გეგმის 78%). გადასახდელების კომპონენტების დონეზე, სხვა კომპონენტებთან შედარებით დაბალი შესრულების მაჩვენებელი არაფინანსური აქტივების  ზრდის და ვალდებულებების კლების მუხლით გადასახდელებისათვის  ვლინდება (წლიური გეგმის 77% და 73%, შესაბამისად).

საგადასახადო შემოსავლების მოცულობა წლიური დამტკიცებული გეგმით განისაზღვრა 7,980 მლნ ლარის დონეზე, ხოლო 2016 წლის იანვარ-ნოემბერში მობილიზებულია 7,178.5 მლნ ლარი (90%), რაც გასული წლის ანალოგიურ მაჩვენებელს 403 მლნ ლარით (6%-ით) აღემატება.

საანგარიშო პერიოდში, სახელმწიფო ბიუჯეტის ხარჯების შესრულებამ წლიური გეგმის 90%-ს გაუტოლდა დაგასული  წლის ანალოგიურ პერიოდთან შედარებით ზრდამ 511 მლნ ლარი შეადგინა. აღნიშნული ზრდა ძირითადად უკავშირდება სოციალური უზრუნველყოფის მუხლით (286 მლნ ლარით) და საქონლისა და მომსახურების მუხლით (189 მლნ ლარით) ხარჯების ზრდას, გასული წლის ამავე პერიოდის შესრულებასთან შედარებით.

წლის განმავლობაში ხარჯების მოსალოდნელ დინამიკასთან მიმართებაში, თუ დავუშვებთ, რომ ბიუჯეტის კანონით განსაზღვრული გეგმური მაჩვენებლები შესრულდება, მაშინ 2016 წლის უკანასკნელ თვეს, დეკემბერში,  შესრულების საშუალო მაჩვენებელი დაახლოებით 119 მლნ ლარით (1.2-ჯერ) უნდა აღემატებოდეს 11 თვის ათვისების საშუალო მაჩვენებელს. გასული წლის ანალოგიური პერიოდისათვის აღნიშნული ფარდობა 1.4-ს გაუტოლდა.