,,საქართველოს 2016 წლის სახელმწიფო ბიუჯეტის შესახებ” საქართველოს კანონში ცვლილების პროექტის მიხედვით შემოსულობების საპროგნოზო მოცულობა კანონით განსაზღვრულ მაჩვენებელთან შედარებით იზრდება 173 მლნ ლარით (1.7%-ით) და შეადგენს 10,318 მლნ ლარს.
კანონპროექტის მიხედვით, შემოსულობების აგრეგატული მაჩვენებლის ცვლილება ითვალისწინებს საგარეო წყაროდან - გრანტებისა და კრედიტების სახით მოზიდული სახსრების და აგრეთვე, საშინაო წყაროდან - საშინაო ვალდებულებების ზრდის მუხლით შემოსულობების მაჩვენებლის ცვლილებას (საგადასახადო და სხვა შემოსავლების, ფინანსური და არაფინანსური აქტივების კლების მუხლით შემოსულობების გეგმური მაჩვენებლები უცვლელია. შედეგად, შემოსავლების მაჩვენებელი მცირდება 8 მლნ ლარით, ხოლო ვალდებულებების ზრდის მუხლით შემოსულობების სიდიდე იზრდება 181 მლნ ლარით). კერძოდ:
- გრანტების სახით დაგეგმილი შემოსავლები მცირდება 8.2 მლნ ლარით და განისაზღვრება 246.8 მლნ ლარით
- ვალდებულებების ზრდის მაჩვენებელი იზრდება 181.2 მლნ ლარით და განისაზღვრება 1,456.2 მლნ ლარის დონეზე
რაც შეეხება სახელმწიფო ბიუჯეტის გადასახდელებს, წარმოდგენილი ცვლილებით გადასახდელების ჯამური მაჩვენებელი იზრდება 153 მლნ ლარით (2%-ით) 2016 წლის ბიუჯეტის კანონით გადასახდელების ჯამური მაჩვენებელთან და განსაზღვრულია 10,298 მლნ ლარის დონეზე და 2015 წელთან შედარებით გადასახდელების ზრდის ტემპი 6.1%-ს შეადგენს. ერძოდ:
- შემცირებულია არაფინანსური აქტივების ზრდის (ე.წ. კაპიტალური ხარჯები) გეგმური მოცულობა 36 მლნ ლარით: 2016 წლის 10 თვის მდგომარეობით, აღნიშნული კომპონენტის შესრულება გადასახდელებიდან ყველაზე დაბალი შესრულებით(წლიური გეგმის 69%) ხასიათდება;
- იზრდება ხარჯების(ე.წ. მიმდინარე ხარჯები) გეგმური მაჩვენებელი 128 მლნ ლარით და ფინანსური აქტივების ზრდა 62 მლნ ლარით;
- ვალდებულებების კლების კომპონენტი უცვლელი რჩება.
