პარლამენტის საბიუჯეტო ოფისის ,,საქართველოს მაკროეკონომიკური გარემოს ყოველთვიური მიმოხილვა" ასახავს ძირითადი მაკროეკონომიკური მაჩვენებლების ტენდენციებს. მიმოხილვა ეყრდნობა საქართველოს სტატისტიკის ეროვნული სამსახურის, საქართველოს ეროვნული ბანკის და საქართველოს ფინანსთა სამინისტროს მონაცემებს.
- სტატისტიკის ეროვნული სამსახურის წინასწარი შეფასებით, 2025 წლის ნოემბერში*, წინა წლის შესაბამის პერიოდთან შედარებით, რეალური მთლიანი შიდა პროდუქტის ზრდის ტემპმა 7.2% შეადგინა;
- 2025 წლის დეკემბერში, წინა წლის ანალოგიურ თვესთან შედარებით, ინფლაციის დონე 4.0%-ით განისაზღვრა, ანუ მიზნობრივი ინფლაციის 3.0%-იან მაჩვენებელზე შედარებით მაღალი. წლიური ინფლაციის ფორმირებაზე გავლენა იქონია, ძირითადად, ფასების დინამიკამ სურსათსა და უალკოჰოლო სასმელებზე, ჯანმრთელობის დაცვაზე, ალკოჰოლურ სასმელებზე და თამბაქოზე;
- 2025 წლის ნოემბერში*, წინა წლის ნოემბერთან შედარებით, ნაერთი ბიუჯეტის შემოსავლები 13.1%-ით გაიზარდა, ხოლო ხარჯები 2.0%-ით შემცირდა;
- 2025 წლის ნოემბერში*, კომერციული ბანკების მიერ ეროვნულ ეკონომიკაზე გაცემული სესხები, წინა წლის შესაბამის პერიოდთან შედარებით, 13.3%-ით გაიზარდა და 66,508.3 მლნ ლარი შეადგინა, მათგან ყველაზე მეტი გაცემულია მშენებლობის, ვაჭრობის და მრეწველობის დარგებში;
- 2025 წლის იანვარ-ნოემბერში*, წინა წლის შესაბამის პერიოდთან შედარებით, საქონლის ექსპორტი 10.1%-ით, ხოლო იმპორტი 9.3%-ით გაიზარდა, რის შედეგადაც სავაჭრო ბრუნვა (არადეკლარირებული ვაჭრობის გარეშე) 9.5%-ით გაიზარდა და 23,218.1 მლნ აშშ დოლარი შეადგინა;
- 2025 წლის ნოემბერში*, წინა წლის შესაბამის პერიოდთან მიმართებით, საქართველოში ფულადი გზავნილები 11.9%-ით გაიზარდა და 298.4 მლნ აშშ დოლარი შეადგინა. გზავნილების ძირითად წყაროს ევროკავშირის ქვეყნები (გზავნილების მთლიანი ოდენობის 45.5%), აშშ (19.4%) და რუსეთი (12.9%) წარმოადგენდნენ;
- 2025 წლის დეკემბერში მთლიანი საერთაშორისო რეზერვები 6,159 მლნ აშშ დოლარით განისაზღვრა, რაც წინა წლის ანალოგიურ მონაცემთან შედარებით, 38.4%-ით, ხოლო წინა თვესთან შედარებით 5.9%-ით გაიზარდა;
- 2025 წლის ნოემბერში*, წინა თვესთან შედარებით, დოლარიზაციის მაჩვენებელი, როგორც დეპოზიტებზე (0.62 პპ-ით), ასევე სესხებზე (0.11 პპ-ით) შემცირდა;
- 2025 წლის დეკემბერში, წინა თვესთან შედარებით, ლარის გაცვლითი კურსი აშშ დოლარის მიმართ 0.3%-ით გამყარდა, ევროს მიმართ 0.9%-ით გაუფასურდა, ხოლო თურქულ ლირასთან მიმართებით 1.3%-ით გამყარდა;
- 2025 წლის დეკემბრის თვეში, რეგიონის ქვეყნების ვალუტების გაცვლითი კურსები აშშ დოლართან მიმართებაში, თურქული ლირის გარდა, გამყარდა.
დოკუმენტი ინტერაქტიულ ფორმატში იხილეთ ბმულზე:
https://infogram.com/dekembris-makroekonomikuri-mimokhilva2025-1h0r6rzwmoonw4e
დოკუმენტი PDF ფორმატში იხილეთ ბმულზე:
