პარლამენტის საბიუჯეტო ოფისის ,,საქართველოს მაკროეკონომიკური გარემოს ყოველთვიური მიმოხილვა" ასახავს ძირითადი მაკროეკონომიკური მაჩვენებლების ტენდენციებს. მიმოხილვა ეყრდნობა საქართველოს სტატისტიკის ეროვნული სამსახურის, საქართველოს ეროვნული ბანკის და საქართველოს ფინანსთა სამინისტროს მონაცემებს.
- სტატისტიკის ეროვნული სამსახურის წინასწარი შეფასებით, 2025 წლის მაისში*, წინა წლის შესაბამის პერიოდთან შედარებით, რეალური მთლიანი შიდა პროდუქტის ზრდის ტემპმა 7.5% შეადგინა;
- 2025 წლის ივნისში, წინა წლის ანალოგიურ თვესთან შედარებით, ინფლაციის დონე 4.0%-ით განისაზღვრა, ანუ მიზნობრივი ინფლაციის 3.0%-იან მაჩვენებელზე შედარებით მაღალი. წლიური ინფლაციის ფორმირებაზე გავლენა იქონია, ძირითადად, ფასების დინამიკამ სურსათსა და უალკოჰოლო სასმელებზე, ჯანმრთელობის დაცვაზე, ტრანსპორტზე, კავშირგაბმულობაზე და განათლებაზე;
- 2025 წლის მაისში*, წინა წლის მაისთან შედარებით, ნაერთი ბიუჯეტის შემოსავლები 40.2%-ით, ხოლო ხარჯები 10.3%-ით გაიზარდა;
- 2025 წლის მაისში* კომერციული ბანკების მიერ ეროვნულ ეკონომიკაზე გაცემულმა სესხებმა, წინა წლის შესაბამის პერიოდთან შედარებით, 14.6%-ით მოიმატა და 62.5 მლრდ ლარი შეადგინა, მათგან ყველაზე მეტი გაცემულია ვაჭრობის, მშენებლობის და მრეწველობის დარგებში;
- 2025 წლის იანვარ-მაისში*, წინა წლის შესაბამის პერიოდთან შედარებით, საქონლის ექსპორტმა 14.6%-ით, ხოლო იმპორტმა 12.8%-ით მოიმატა, რის შედეგადაც სავაჭრო ბრუნვა (არადეკლარირებული ვაჭრობის გარეშე) 13.3%-ით გაიზარდა და 9,790.6 მლნ აშშ დოლარი შეადგინა;
- 2025 წლის მაისში*, წინა წლის შესაბამის პერიოდთან მიმართებით, საქართველოში ფულადი გზავნილები 11.6%-ით გაიზარდა და 317.4 მლნ აშშ დოლარი შეადგინა. გზავნილების ძირითად წყაროს ევროკავშირის ქვეყნები (გზავნილების მთლიანი ოდენობის 44.1%), აშშ (18.6%) და რუსეთი (13.8%) წარმოადგენდნენ;
- 2025 წლის ივნისში მთლიანი საერთაშორისო რეზერვები 4,688 მლნ აშშ დოლარით განისაზღვრა, რაც წინა წლის ანალოგიურ მონაცემთან შედარებით, 2.3%-ით, ხოლო წინა თვესთან შედარებით 2.3%-ით გაიზარდა;
- 2025 წლის მაისში*, წინა თვესთან შედარებით, დოლარიზაციის მაჩვენებელი დეპოზიტებზე (1.18 პპ-ით), ხოლო სესხებზე (0.39 პპ-ით) შემცირდა;
- 2025 წლის ივნისში, წინა თვესთან შედარებით, ლარის გაცვლითი კურსი აშშ დოლარის მიმართ 0.5%-ით გამყარდა, ევროს მიმართ 1.3%-ით გაუფასურდა, ხოლო თურქულ ლირასთან მიმართებით 2.3%-ით გამყარდა;
- 2025 წლის ივნისის თვეში, რეგიონის ქვეყნების ვალუტების გაცვლითი კურსები აშშ დოლართან მიმართებაში, თურქული ლირის გარდა, გამყარდა.
დოკუმენტი ინტერაქტიულ ფორმატში იხილეთ ბმულზე: https://infogram.com/ivnisis-makroekonomikuri-mimokhilva2025-1h1749w835j7l2z
დოკუმენტი PDF ფორმატში იხილეთ ბმულზე:
