პარლამენტის საბიუჯეტო ოფისის ,,საქართველოს მაკროეკონომიკური გარემოს ყოველთვიური მიმოხილვა" ასახავს ძირითადი მაკროეკონომიკური მაჩვენებლების ტენდენციებს. მიმოხილვა ეყრდნობა საქართველოს სტატისტიკის ეროვნული სამსახურის, საქართველოს ეროვნული ბანკის და საქართველოს ფინანსთა სამინისტროს მონაცემებს.
- სტატისტიკის ეროვნული სამსახურის წინასწარი შეფასებით, 2025 წლის მარტში, წინა წლის შესაბამის პერიოდთან შედარებით, რეალური მთლიანი შიდა პროდუქტის ზრდის ტემპმა 9.0% შეადგინა;
- 2025 წლის აპრილში, წინა წლის ანალოგიურ თვესთან შედარებით, ინფლაციის დონე 3.4%-ით განისაზღვრა, ანუ მიზნობრივი ინფლაციის 3.0%-იან მაჩვენებელზე შედარებით მაღალი. წლიური ინფლაციის ფორმირებაზე გავლენა იქონია, ძირითადად, ფასების დინამიკამ სურსათსა და უალკოჰოლო სასმელებზე, ჯამრთელობის დაცვაზე, ალკოჰოლურ სასმელებსა და თამბაქოზე, განათლებაზე;
- 2025 წლის მარტში, წინა წლის მარტთან შედარებით, ნაერთი ბიუჯეტის შემოსავლები 0.5%-ით შემცირდა, ხოლო ხარჯები 25.5%-ით გაიზარდა;
- 2025 წლის მარტში კომერციული ბანკების მიერ ეროვნულ ეკონომიკაზე გაცემულმა სესხებმა, წინა წლის შესაბამის პერიოდთან შედარებით, 18.4%-ით მოიმატა და 61.6 მლრდ ლარი შეადგინა, მათგან ყველაზე მეტი გაცემულია ვაჭრობის, მშენებლობისა და მრეწველობის დარგებში;
- 2025 წლის იანვარ-მარტში, წინა წლის შესაბამის პერიოდთან შედარებით, საქონლის ექსპორტმა 5.7%-ით, ხოლო იმპორტმა 20.1%-ით მოიმატა, რის შედეგადაც სავაჭრო ბრუნვა (არადეკლარირებული ვაჭრობის გარეშე) 16.1%-ით გაიზარდა და 5,618.6 მლნ აშშ დოლარი შეადგინა;
- 2025 წლის მარტში, წინა წლის შესაბამის პერიოდთან მიმართებით, საქართველოში ფულადი გზავნილები 3.9%-ით გაიზარდა და 291.9 მლნ აშშ დოლარი შეადგინა. გზავნილების ძირითად წყაროს ევროკავშირის ქვეყნები (გზავნილების მთლიანი ოდენობის 45.1%), აშშ (18.8%) და რუსეთი (13.0%) წარმოადგენდნენ;
- 2025 წლის აპრილში მთლიანი საერთაშორისო რეზერვები 4,518 მლნ აშშ დოლარით განისაზღვრა, რაც წინა წლის ანალოგიურ მონაცემთან შედარებით, 6.1%-ით შემცირდა, ხოლო წინა თვესთან შედარებით 4.8%-ით გაიზარდა;
- 2025 წლის მარტში, წინა თვესთან შედარებით, დოლარიზაციის მაჩვენებელი როგორც დეპოზიტებზე (0.41 პპ-ით), ასევე სესხებზე (0.04 პპ-ით) შემცირდა;
- 2025 წლის აპრილში, წინა თვესთან შედარებით, ლარის გაცვლითი კურსი აშშ დოლარის მიმართ 0.9%-ით გამყარდა, ევროს მიმართ 3.1%-ით გაუფასურდა, ხოლო თურქულ ლირასთან მიმართებით 3.7%-ით გამყარდა;
- 2025 წლის აპრილის თვეში, რეგიონის ქვეყნების ვალუტების გაცვლითი კურსები აშშ დოლართან მიმართებაში, რუსული რუბლის და აზერბაიჯანული მანათის გარდა, გაუფასურდა.
დოკუმენტი ინტერაქტიულ ფორმატში იხილეთ ბმულზე: https://infogram.com/aprilis-makroekonomikuri-mimokhilva2025-1h984wvnj0mvz2p?live
დოკუმენტი PDF ფორმატში იხილეთ ბმულზე:
