„საქართველოს 2022 წლის სახელმწიფო ბიუჯეტის შესრულების მიმოხილვა" - მომზადებულია საქართველოს მთავრობის მიერ საქართველოს პარლამენტისათვის წარდგენილი „საქართველოს 2022 წლის სახელმწიფო ბიუჯეტის შესრულების წლიური ანგარიშის“ საფუძველზე.

2022 წელს:

• 2022 წელს სახელმწიფო ბიუჯეტის შემოსულობებმა 20,529.2 მლნ ლარი შეადგინა, რაც წლიური გეგმის (20,449.0 მლნ ლარი) 100.4%-ს შეადგენს, ხოლო წინა წლის ანალოგიურ მაჩვენებელს 2,151.5 მლნ ლარით (11.7%-ით) აღემატება გადასახადებიდან მიღებული შემოსავლების მატების გავლენით. კერძოდ, გადასახადებიდან მიღებული შემოსავლები როგორც ნომინალურ გამოხატულებაში, ასევე, წილობრივად მთლიან შემოსულობებში გაზრდილია 2020-2021 წლებთან შედარებით და 2022 წლისთვის 14,976.7 მლნ ლარს (შემოსულობების 73.0%) შეადგენს.
• 2022 წელს სახელმწიფო ბიუჯეტის გადასახდელებმა 20,163.0 მლნ ლარი შეადგინა, რაც წლიური გეგმის (20,186.0 მლნ ლარი) 99.9%-ს შეადგენს, ხოლო წინა წლის ანალოგიურ მაჩვენებელს 355.5 მლნ ლარით (1.8%-ით) აღემატება. რაც გამოწვეულია ერთი მხრივ, ხარჯების (1,152.3 მლნ ლარით), არაფინანსური აქტივების ზრდისა (760.2 მლნ ლარით) და ფინანსური აქტივების ზრდის (166.3 მლნ ლარით) კომპონენტების მაჩვენებლების მატებით, ხოლო, მეორე მხრივ, ვალდებულებების კლების კომპონენტის მაჩვენებლის 1,723.3 მლნ ლარით შემცირებით (2021 წელს მოხდა ევრობონდების ძირითადი თანხის დაფარვა 1,706.7 მლნ ლარის ოდენობით).
• 2022 წლის დასაწყისისათვის სახელმწიფო ბიუჯეტის ნაშთის მოცულობამ შეადგინა 881.4 მლნ ლარი. წლის განმავლობაში მიღებული შემოსულობების და გაწეული გადასახდელების გათვალისწინებით, ნაშთის დაგროვებამ შეადგინა 366.2 მლნ ლარი და შესაბამისად, 2022 წლის ბოლოსათვის, სახელმწიფო ბიუჯეტის ანგარიშზე არსებულმა ნაშთის მოცულობამ შეადგინა 1,247.6 მლნ ლარი.
• „საქართველოს 2022 წლის სახელმწიფო ბიუჯეტის შესახებ“ საქართველოს კანონის მიხედვით ერთიანი ბიუჯეტის უარყოფითი მთლიანი სალდო (დეფიციტი) 1,963.0 მლნ ლარით განისაზღვრა, რაც პროგნოზირებული მშპ-ის 2.7%-ს შეადგენდა. რაც შეეხება ფაქტობრივ შესრულებას, სახელმწიფოს ერთიანი ბიუჯეტის დეფიციტმა 1,495.5 მლნ ლარი - მშპ-ის 2.1%  შეადგინა, აღნიშნული კანონით განსაზღვრულ მაჩვენებელთან (მშპ-ის 2.7%) შედარებით 0.6 პროცენტული პუნქტით ნაკლები.
• „საქართველოს 2022 წლის სახელმწიფო ბიუჯეტის შესახებ“ საქართველოს კანონის მიხედვით 2022 წლის ბოლოსთვის მთავრობის ვალის ზღვრული მოცულობა განისაზღვრა მშპ-ის 39.6%-ით, ხოლო საჯარო და კერძო თანამშრომლობის პროექტების ფარგლებში აღებული ვალდებულებების მიმდინარე ღირებულების შეფასება − მშპ-ის 0.5%-ით − ჯამი: მშპ-ის 40.1%. ფაქტიური მდგომარეობით კი მთავრობის ვალის ნაშთმა 2022 წლის 31 დეკემბრისათვის მშპ-ის 39.8% შეადგინა. საჯარო და კერძო თანამშრომლობის პროექტების ფარგლებში აღებული ვალდებულებების მიმდინარე ღირებულება (2022 წლის 1 იანვრის მდგომარეობით) მშპ-ის 0.5%-ს შეადგენს, შესაბამისად ჯამურად აღნიშნული ვალდებულებები მშპ-ის 40.3%-ია.

დეტალურად იხილეთ სრული დოკუმენტი.