მიმდინარე წლის 26-27 ივნისს ევროკავშირის მხარდაჭერით საქართველოს პარლამენტისა და ნიდერლანდების სამეფოს ფინანსთა სამინისტროს ეკონომიკისა და ფინანსების ეროვნული აკადემიის ორწლიანი დაძმობილების პროექტის „საჯარო ფინანსებზე ზედამხედველობის გაძლიერება“ ფარგლებში, საქართველოს პარლამენტის საბიუჯეტო ოფისს ავსტრიის ფინანსთა სამინისტროს კლიმატის გუნდის ხელმძღვანელი, ხოსე დელგადო და ამავე სამინისტროს ბიუჯეტის სტრატეგიის, ხარჯების მიმოხილვებისა და საერთაშორისო ურთიერთობების განყოფილების თანამშრომელი მაგდალენა მანდლ ეწვივნენ.

ავსტრიელმა ექსპერტებმა ტრენინგი ჩაატარეს მწვანე ბიუჯეტირების თემატიკაზე, რომელსაც ესწრებოდნენ საქართველოს პარლამენტის საბიუჯეტო ოფისისა და პარლამენტის კომიტეტების აპარატების თანამშრომლები.

ორდღიანი ტრენინგის განმავლობაში მწვანე ბიუჯეტირება განხილულ იქნა როგორც ერთგვარი ხიდი კლიმატის პოლიტიკასა და ბიუჯეტს შორის, ექსპერტებმა ქართველ კოლეგებს გაუზიარეს ავსტრიის, როგორც მწვანე ბიუჯეტირების მიმართულებით ერთ-ერთი მოწინავე ქვეყნის გამოცდილება და დეტალურად განიხილეს როგორც საერთაშორისო ჩარჩო-ვალდებულებები, ასევე ავსტრიაში მწვანე ბიუჯეტირებასთან დაკავშირებული დოკუმენტები (ავსტრიის მწვანე ბიუჯეტირების მეთოდოლოგია, მწვანე დანახარჯების მიმოხილვები, წლიური ბიუჯეტის თანდართული კლიმატის ანგარიში), ისაუბრეს მწვანე ობლიგაციებსა და მათ მნიშვნელობაზე.

ავსტრიელმა ექსპერტებმა დეტალური ინფორმაცია მიაწოდეს ტრენინგის მონაწილეებს იმის შესახებ, თუ როგორია მწვანე ბიუჯეტირების მიმართულებით ავსტრიის ინსტიტუციური მოწყობა, როგორ ხდება როგორც დარგობრივ სამინისტროებთან, ასევე პარლამენტთან და აუდიტის სამსახურთან თანამშრომლობა, რა სახის გამოწვევებია და როგორია მათი სამომავლო გეგმები. ექსპერტებმა განსაკუთრებულად ხაზი გაუსვეს მათ მჭიდრო თანამშრომლობას ავსტრიის პარლამენტის საბიუჯეტო ოფისთან, როგორც დამოუკიდებელ ფისკალურ ინსტიტუციასთან, რომელსაც მნიშვნელოვანი როლი აკისრია მწვანე ბიუჯეტირების პროცესში.

ექსპერტებმა გასცეს რეკომენდაციები საქართველოსა და ასევე კონკრეტულად, პარლამენტის საბიუჯეტო ოფისის გაძლიერების მიმართულებით მწვანე ბიუჯეტირების საკითხებში.

გალერეა