მიმდინარე წლის 19-22 ივნისს, ავსტრიის ქალაქ ვენაში, „ევროკავშირი გენდერული თანასწორობისთვის: რეფორმების ტექნიკური ჯგუფის“ (EU4Gender Equality Reform Helpdesk) პროექტის ორგანიზებით საქართველოს და ასევე სხვადასხვა ქვეყნის წარმომადგენლებისათვის სამუშაო ვიზიტის ფარგლებში გაიმართა სამუშაო შეხვედრები გენდერული ბიუჯეტირების თემატიკაზე. მონაწილეებს საშუალება ქონდათ შეხვედროდნენ ავსტრიის საბიუჯეტო ოფისის, ფინანსთა სამინისტროს, ქალაქ ვენის მერიის და სხვა იმ უწყებების წარმომადგენლებს, რომლებიც ახორციელებენ გენდერულ ბიუჯეტირებას და უშუალოდ მათგან მოესმინათ გენდერული ბიუჯეტირების იმპლიმენტაციის როგორც თეორიული, ასევე პრაქტიკული საკითხები.

განსაკუთრებით მნიშვნელოვანი იყო შეხვედრა ავსტრიის პარლამენტის საბიუჯეტო ოფისის წარმომადგენლებთან, ვინაიდან აღნიშნული, ისევე როგორც საქართველოს პარლამენტის საბიუჯეტო ოფისი, წარმოადგენს დამოუკიდებელ ფისკალურ ინსტიტუციას, რომელსაც მკაფიოდ აქვს განსაზღვრული გენდერული ბიუჯეტირების პროცესში შესაბამისი როლი და ფუნქციები. შორენა კახიძემ ისაუბრა საქართველოს გამოცდილებაზე, არსებულ მიღწევებსა და გამოწვევებზე გენდერული ბიუჯეტირების კუთხით.

პარლამენტის საბიუჯეტო ოფისი აქტიურად არის ჩართული გენდერული ბიუჯეტირების იმპლიმენტაციის პროცესში და ამ საკითხზე მჭიდროდ თანამშრომლობს ევროკავშირის პროექტთან. აღნიშნული შეხვედრების ფარგლებში მოხდა გამოცდილების გაზიარება ქვეყნებს შორის და დაისახა სამომავლო თანამშრომლობის გეგმები.

გალერეა