ევროკავშირის პროექტის - „საჯარო მმართველობის რეფორმის მხარდაჭერა საქართველოში“  ორგანიზებით მიმდინარე წლის 28-30 ოქტომბერს -  კახეთში, სასტუმრო „ამბასადორი კაჭრეთში“ დაინტერესებული მხარეებისათვის ჩატარდა ტრენინგი კანონპროექტის ფინანსური გავლენის შეფასების მომზადების თაობაზე.

ევროკავშირის პროექტი „საჯარო მმართველობის რეფორმის მხარდაჭერა საქართველოში“ 2019 წლიდან მიმდინარეობს და ინსტიტუციური და ადამიანური რესურსების შესაძლებლობების გაძლიერების გზით უზრუნველყოფს საქართველოში მიმდინარე საჯარო მმართველობის რეფორმების განხორციელების ტექნიკურ მხარდაჭერას.

ტრენინგის დაგეგმვა განაპირობა კანონპროექტების ავტორების/ინიციატორების მხრიდან განმარტებითი ბარათის ფინანსური დასაბუთების მომზადების საკითხისადმი მზარდმა ინტერესმა.

ტრენინგი განკუთვნილი იყო სამინისტროებისა და მთავრობის ადმინისტრაციის იურიდიული და საფინანსო/ეკონომიკური დეპარტამენტის თანამშრომლებისათვის, რომლებიც უშუალოდ ჩართულნი არიან კანონპროექტების განმარტებითი ბარათის ფინანსური დასაბუთების მომზადებაში.

ტრენინგს უძღვებოდა საქართველოს პარლამენტის საბიუჯეტო ოფისის უფროსის მოვალეობის შემსრულებელი შორენა კახიძე, ხოლო ევროკავშირის მხრიდან მოწვეული  იყო საერთაშორისო ექსპერტი ხარჯთაღრიცხვისა და ბიუჯეტირების თემებზე ანა სტანკაიტიენე. ტრენინგში თანატრენერებად ჩართულნი იყვნენ საბიუჯეტო ოფისის ფინანსური შედეგების შეფასებისა და საკანონმდებლო პროცესის ხელშეწყობის განყოფილების წარმომადგენლები: ჯუნა გერსამია და მარიამ კახიძე.

ტრენინგზე განხილული იყო პარლამენტის საბიუჯეტო ოფისის მიერ ღია პარლამენტის 2021-2022 წლების სამოქმედო გეგმის მე-7 მიზნის "საკანონმდებლო პროცესის ხელშეწყობა და გაუმჯობესება" ფარგლებში შემუშავებული დოკუმენტი „კანონპროექტის განმარტებითი ბარათის ფინანსური გავლენის შეფასების მომზადების სახელმძღვანელო პრინციპები და მეთოდოლოგიური მითითებები“.

მონაწილეებს ჰქონდათ საშუალება სიღრმისეულად გაცნობოდნენ კანონპროექტის ფინანსური გავლენის შეფასების მომზადების სახელმძღვანელო დოკუმენტს.

ტრენინგის პირველი დღე დაეთმო ისეთ საკითხებს, როგორებიცაა: დამოუკიდებელი ფისკალური ინსტიტუციები/პარლამენტის საბიუჯეტო ოფისი და მისი როლი საკანონმდებლო პროცესში, საკანონმდებლო ინიციატივის ფინანსური გავლენის შეფასების სამართლებრივი საფუძვლები, განმარტებითი ბარათის ფინანსური დასაბუთების ნაწილის სტრუქტურა, საკანონმდებლო პროცესი და მისი კავშირი საბიუჯეტო პროცესთან, საშუალოვადიანი დაგეგმარება, მისი მნიშვნელობა და საკანონმდებლო ინიციატივის კავშირი საშუალოვადიან დაგეგმარებასთან და დაფინანსების წყაროები, სახეები და საკანონმდებლო ინიციატივის დაფინანსების წყაროს განსაზღვრა.

მეორე დღეს აქცენტი გაკეთდა საკანონმდებლო ინიციატივის გავლენაზე, ბიუჯეტის საშემოსავლო/საგადასახადო ნაწილზე და შემოსავლებისა და ხარჯების სახეებზე. ასევე განხილული იყო სახელმწიფოს ფინანსური ვალდებულების ცნება, მისი სახეები და საკანონმდებლო ინიციატივის კავშირი ახალ ფინანსურ ვალდებულებებთან.

ტრენინგის მესამე დღე გახსნა ევროკავშირის მოწვეულმა საერთაშორისო ექსპერტმა ანა სტანკაიტიენემ, რომლის სასაუბრო თემა იყო პოლიტიკის დოკუმენტების ხარჯებისა და ბიუჯეტის დადგენა და მისი შედარება საკანონმდებლო ინიციატივის ფინანსური გავლენის შეფასებასთან. დღის მეორე ნახევარი კვლავ წარიმართა შორენა კახიძის მიერ, რომელმაც ისაუბრა საკანონმდებლო ინიციატივით განსაზღვრული ქმედებების პირდაპირი კავშირზე ფიზიკური და იურიდიული პირებთან და მათ ფინანსურ შედეგებთან. ასევე განიმარტა შესაბამის ბიუჯეტში კანონპროექტით დადგენილი გადასახადის, მოსაკრებლის ან სხვა სახის გადასახდელის (ფულადი შენატანის) ოდენობის ცნება და მისი განსაზღვრის პრინციპი.

ტრენინგის განმავლობაში, ყოველი დღის ბოლოს, მონაწილეები აქტიურად მუშაობდნენ  პრაქტიკულ დავალებებზე ცალკეული კანონპროექტების განმარტებითი ბარათების ფინანსური დასაბუთების კუთხით, ჯგუფურ ფორმატში განიხილავდნენ კონკრეტულ მაგალითებს და წარმოადგენდნენ შესრულებული დავალებების შედეგებს. აღნიშნულმა აქტივობებმა მონაწილეებს ტრენინგის ფარგლებში მიღებული თეორიული ცოდნის პრაქტიკაში გამოყენების საშუალება მისცა. მათ ასევე ჰქონდათ შესაძლებლობა ონლაინ ფორმატში შეემოწმებინათ მიღებული ცოდნა ტრენერის მიერ შემოთავაზებული სახალისო გამოკითხვის საშუალებით. ტრენინგის ბოლოს მონაწილეებს გადაეცათ სერტიფიკატები.

გალერეა