რეალურ სექტორთან დაკავშირებით, 2018 წლის II კვარტალში, წინასწარი შეფასებით, მთლიანი შიდა პროდუქტის (მშპ) საშუალო რეალურმა ზრდამ 6.0% შეადგინა. 2018 წლის II კვარტალში წლიური ინფლაციის საშუალო მაჩვენებელი 2.4%-ით განისაზღვრა, რაც ნაკლებია ეროვნული ბანკის მიერ გამოცხადებულ მიზნობრივ მონაცემთან (3%) შედარებით.
ფისკალური სექტორთან მიმართებაში, 2018 წლის II კვარტალში ნაერთი ბიუჯეტის შემოსავლები 8.5%-ით გაიზარდა გასული წლის ანალოგიურ პერიოდთან შედარებით, ხოლო ხარჯებმა და არაფინანსური აქტივების შეძენამ 0.2%-ით მოიმატა. 2018 წლის II კვარტალის ბოლოს - 30 ივნისის მდგომარეობით, სახელმწიფო ვალის ნაშთმა ნომინალურ გამოსახულებაში 15,644 მლნ ლარი შეადგინა.
საგარეო სექტორის დინამიკასთან დაკავშირებით, 2018 წლის II კვარტალში საქონლით საგარეო სავაჭრო ბრუნვა 25%-ით მეტია გასული წლის ანალოგიურ პერიოდის მაჩვენებელზე. კერძოდ, ექსპორტი 30%-ით, იმპორტი კი 23%-ით გაიზარდა. ამასთან, 2018 წლის II კვარტალში, წინა წლების შესაბამის პერიოდებთან შედარებით, ექსპორტის ერთ-ერთი ყველაზე მაღალი მაჩვენებელი დაფიქსირდა. 2018 წლის II კვარტალის მდგომარეობით, მთლიანი საერთაშორისო რეზერვები 1.6%-ით გაიზარდა 2017 წლის ანალოგიურ პერიოდთან შედარებით და 3,005 მლნ აშშ დოლარი შეადგინა. 2018 წლის II კვარტალში ლარის კურსი აშშ დოლარის მიმართ, წინა კვარტალთან შედარებით 1.6%-ით გამყარდა, ხოლო 2017 წლის II კვარტალთან მიმართებით 1.1%-ით გაუფასურდა.
მონეტარულ სექტორთან მიმართებაში, 2018 წლის II კვარტალში, წინა კვარტალთან შედარებით, საბაზრო საპროცენტო განაკვეთები სესხებზე 1.0%-ული პუნქტით შემცირდა და 12.6%-ს გაუტოლდა. წინა წლის ანალოგიურ პერიოდთან შედარებით, 2018 წლის II კვარტალში კომერციული ბანკების მიერ გაცემული სესხები 19.9%-ით გაიზარდა. რაც შეეხება დოლარიზაციას, 2018 წლის II კვარტალში შემცირდა როგორც დეპოზიტების, ისე განსაკუთრებით სესხების დოლარიზაციის მაჩვენებელი.
სოციალური და შრომის ბაზრის ინდიკატორებიდან, 2018 წლის I კვარტალში, წინა წლის შესაბამის პერიოდთან შედარებით, ბიზნეს სექტორში დასაქმებულების რაოდენობა 32.0 ათასი კაცით გაიზარდა და 637.0 ათასი კაცი შეადგინა. 2018 წლის II კვარტალში, წინა წლის ანალოგიურ პერიოდთან მიმართებით, საარსებო მინიმუმი მცირედით შემცირდა.
