2019 წლის სახელმწიფო ბიუჯეტის კვარტალური მიმოხილვა მოკლედ ასახავს სახელმწიფო ბიუჯეტის შესრულების მიმდინარეობას პირველი კვარტლისათვის. ძირითადი მაჩვენებლების შესრულების მდგომარეობა შემდეგია:
- სახელმწიფო ბიუჯეტის შემოსულობების შესრულების მდგომარეობა, აგრეგატულ დონეზე, გეგმასთან მიმართებაში, მისაღებად შეიძლება შეფასდეს, კერძოდ, ჯამური მაჩვენებელი (2,847 მლნ. ლარი) 3 თვის გეგმის 104%-ს შეადგენს, თუმცა გასული წლის ანალოგიურ მაჩვენებელზე 4%-ით ნაკლებია (მიმდინარე წელს ამოქმედებული საკანონმდებლო ცვლილებებიდან გამომდინარე, ადგილობრივი თვითმმართველი ერთეულების ბიუჯეტებში საგადასახადო შემოსავლების(დღგ) გადანაწილების, ასევე ბიუჯეტის მხარდამჭერი კრედიტების დინამიკის გავლენით).
- რაც შეეხება სახელმწიფო ბიუჯეტის შემოსულობების შესრულებას კომპონენტების დონეზე, 3 თვის გეგმასთან მიმართებაში ყველა ძირითადი სახის შემოსულობა (შემოსავლები, ფინანსური აქტივების და არაფინანსური აქტივების კლების მუხლებით შემოსულობები) გადაჭარბებით იქნა მიღებული, გარდა ვალდებულებების ზრდის მუხლით შემოსულობებისა.
- 2019 წლის სახელმწიფო ბიუჯეტის კანონით გადასახდელების წლიური გეგმა 13,090 მლნ ლარის დონეზე განისაზღვრა. რაც შეეხება შესრულებას, I კვარტლის მდგომარეობით, სახელმწიფო ბიუჯეტის გადასახდელები წლიური გეგმის 21.5%-ს შეადგენს და გასული წლის მაჩვენებელს 7.1 %-ით %-ით (188 მლნ ლარით) აღემატება.
- გადასახდელების კომპონენტების დონეზე, ხარჯების (ე.წ. მიმდინარე ხარჯების) შესრულება საანგარიშო პერიოდში 2,232 მლნ ლარს შეადგენს და გასული წლის ანალოგიურ პერიოდის მაჩვენებელს 6.6%-ით (138.5 მლნ ლარით) აღემატება, ძირითადად, სოციალური უზრუნველყოფის და სხვა ხარჯების მუხლით გაწეული ხარჯების გავლენით. არაფინანსური აქტივების ზრდის (ე.წ. კაპიტალური ხარჯების) შესრულება 314 მლნ ლარს შეადგენს და გასული წლის ანალოგიურ მაჩვენებელს 3.3 მლნ ლარით აღემატება.
- რაც შეეხება სახელმწიფო ბიუჯეტის ვალდებულებების შესრულების მდგომარეობას, საშინაო ვალდებულებების ზრდის ფაქტობრივი(წმინდა) შემოსულობა 2019 წლის I კვარტლის მდგომარეობით 43.1 მლნ ლარს შეადგენს. საგარეო ვალდებულებების ზრდის მუხლით მიღებულმა სესხებმა - 198,5 მლნ ლარი და კვარტალური გეგმის 92.5% შეადგინა, ხოლო საგარეო ვალდებულებების კლებამ - 216 მლნ ლარი.
დეტალური ინფორმაციისათვის, იხ. სრული ანგარიში.
