პარლამენტის საბიუჯეტო ოფისის ,,საქართველოს მაკროეკონომიკური გარემოს ყოველთვიური ბიულეტენი" ასახავს ძირითადი მაკროეკონომიკური მაჩვენებლების ტენდენციებს. მიმოხილვა ეყრდნობა საქართველოს სტატისტიკის ეროვნული სამსახურის, საქართველოს ეროვნული ბანკის და საქართველოს ფინანსთა სამინისტროს მონაცემებს.

2015 წლის იანვარ-ნოემბერში საშუალო წლიურმა ეკონომიკურმა ზრდამ 3.0% შეადგინა. აღნიშნულ ზრდაზე, დღგ-ს მოცულობის ბრუნვების მიხედვით, ყველა დარგს დადებითი გავლენა ჰქონდა. რაც შეეხება ინფლაციას, 2015 წლის დეკემბერში წლიურმა ინფლაციამ 4.9% შეადგინა. მშპ-ის დეფლატორი კი 2015 წლის ნოემბერში 7.7%-ს გაუტოლდა. საგარეო ვაჭრობის მიხედვით, 2015 წლის იანვარ-ნოემბერში ექსპორტი 23%-ით, ხოლო იმპორტი 11%-ით შემცირდა. აღნიშნულ პერიოდში სავაჭრო ბალანსის დეფიციტი 4.9%-ით შემცირდა. კლების ტენდენცია გამოვლინდა ფულად გზავნილებსა და ოფიციალურ საერთაშორისო რეზერვებში, კერძოდ, 2015 წლის იანვარ-ნოემბერში უცხოეთიდან გადმორიცხული ფულადი გზავნილები 26%-ით შემცირდა 2014 წლის ანალოგიურ პერიოდთან შედარებით. ოფიციალური საერთაშორისო რეზერვები 2015 წლის დეკემბერში, წინა წლის შესაბამის პერიოდთან შედარებით, 6.6%-ით შემცირდა და 2,521 მლნ აშშ დოლარი შეადგინა.