პარლამენტის საბიუჯეტო ოფისის ,,საქართველოს მაკროეკონომიკური გარემოს ყოველთვიური მიმოხილვა" ასახავს ძირითადი მაკროეკონომიკური მაჩვენებლების ტენდენციებს. მიმოხილვა ეყრდნობა საქართველოს სტატისტიკის ეროვნული სამსახურის, საქართველოს ეროვნული ბანკის და საქართველოს ფინანსთა სამინისტროს მონაცემებს.

• სტატისტიკის ეროვნული სამსახურის წინასწარი შეფასებით, 2024 წლის სექტემბერში*, წინა წლის შესაბამის პერიოდთან შედარებით, რეალური მთლიანი შიდა პროდუქტის ზრდის ტემპმა 8.3% შეადგინა.
• 2024 წლის ოქტომბერში, წინა წლის ანალოგიურ თვესთან შედარებით, ინფლაციის დონე 0.3%-ით განისაზღვრა, ანუ მიზნობრივი ინფლაციის 3.0%-იან მაჩვენებელზე ნაკლები. წლიური ინფლაციის ფორმირებაზე გავლენა იქონია, ძირითადად, ფასების დინამიკამ სასტუმროებზე, კაფეებსა და რესტორნებზე, ასევე, განათლებაზე, ალკოჰოლურ სასმელებსა და თამბაქოზე, სურსათსა და უალკოჰოლო სასმელებზე.
• 2024 წლის სექტემბერში*, წინა წლის ანალოგიურ პერიოდთან შედარებით, ნაერთი ბიუჯეტის შემოსავლები 21.7%-ით, ხოლო ხარჯები 6.9%-ით გაიზარდა.
• 2024 წლის სექტემბერში* კომერციული ბანკების მიერ ეროვნულ ეკონომიკაზე გაცემულმა სესხებმა 20.6%-ით მოიმატა და 57.5 მლრდ ლარი შეადგინა; მათგან ყველაზე მეტი გაცემულია მშენებლობის, ვაჭრობისა და მრეწველობის დარგებში.
• 2024 წლის იანვარ-სექტემბერში* საქონლის ექსპორტმა 4.1%-ით, ხოლო იმპორტმა 3.6%-ით მოიმატა, რის შედეგადაც სავაჭრო ბრუნვა (არადეკლარირებული ვაჭრობის გარეშე) 3.7%-ით გაიზარდა და 16,777.7 მლნ აშშ დოლარი შეადგინა.
• 2024 წლის სექტემბერში*, წინა წლის შესაბამის პერიოდთან მიმართებით, საქართველოში ფულადი გზავნილები 1.1%-ით შემცირდა და 283.4 მლნ აშშ დოლარი შეადგინა. გზავნილების ძირითად წყაროს ევროკავშირის ქვეყნები (გზავნილების მთლიანი ოდენობის 45.6%), აშშ (17.3%) და რუსეთი (12.6%) წარმოადგენდნენ.
• 2024 წლის სექტემბერში მთლიანი საერთაშორისო რეზერვები 4,085 მლნ აშშ დოლარით განისაზღვრა, რაც წინა წლის ანალოგიურ მონაცემთან შედარებით 20.2%-ით, ხოლო წინა თვესთან შედარებით 13.3%-ით ნაკლებია.
• 2024 წლის სექტემბერში*, წინა თვესთან შედარებით, დოლარიზაციის მაჩვენებელი დეპოზიტებზე გაიზარდა, ხოლო სესხებზე უცვლელი დარჩა.
• 2024 წლის ოქტომბერში, წინა თვესთან შედარებით, ლარი აშშ დოლარის მიმართ მცირედით გაუფასურდა, ხოლო ევროსთან მიმართებით მცირედით გამყარდა.
• 2024 წლის ოქტომბრის თვეში, რეგიონის ქვეყნების ვალუტების გაცვლითი კურსები, აშშ დოლართან მიმართებაში, სომხური დრამისა და რუსული რუბლის გარდა, გაუფასურდა.

დოკუმენტი ინტერაქტიულ ფორმატში იხილეთ ბმულზე: https://infogram.com/oktombris-makroekonomikuri-mimokhilva-1h9j6q7pzqee54g?live

დოკუმენტი PDF ფორმატში იხილეთ ბმულზე: