კვლევითი საქმიანობის დაგეგმვა
პარლამენტის საბიუჯეტო ოფისის კვლევითი საქმიანობა გულისხმობს ფისკალურ და მაკროეკონომიკურ გარემოსთან დაკავშირებულ მნიშვნელოვან საკითხებზე დამოუკიდებელი მაღალხარისხიანი კვლევების/ანალიტიკური ანგარიშების მომზადებას, ეფექტიანი მაკროფისკალური პოლიტიკისა და სახელმწიფო სისტემაში მიმდინარე რეფორმების ხელშეწყობის მიზნით.
საბიუჯეტო ოფისის მიერ კვლევითი საქმიანობის დაგეგმვის პროცესის სტანდარტიზების და გამჭვირვალობის, ასევე დაინტერესებულ მხარეთა დროული და ეფექტიანი ინფორმირებულობის უზრუნველსაყოფად, კვლევითი საქმიანობის წლიური გეგმის ფორმირების, კერძოდ კი, თემატიკის შერჩევის პროცესი ეყრდნობა სპეციალურად შემუშავებულ შიდა პოლიტიკას, რომლის დანერგვასაც საბიუჯეტო ოფისი ეტაპობრივად ახორციელებს.
შიდა პოლიტიკა გეგმის ფორმირების მთავარ კრიტერიუმად განიხილავს კვლევის/პუბლიკაციის მოსალოდნელ ეფექტიანობას საბიუჯეტო ოფისის მანდატის გათვალისწინებით კონკრეტული მიმართულებით საერთაშორისო გამოცდილების შესახებ დაინტერესებულ მხარეთა ინფორმირებულობის ზრდით ან პარლამენტის საბიუჯეტო ოფისის დამოუკიდებელი შეფასებების მიწოდებით. კვლევის/პუბლიკაციის მოსალოდნელი ეფექტიანობა, თავის მხრივ, ითვალისწინებს საკითხის მნიშვნელოვნებას და გადაწყვეტილების მიმღებთა მიერ კვლევის/პუბლიკაციის საფუძველზე შესაბამის საკითხთა მიმართებაში გადაწყვეტილებათა მიღების/ცვლილების ალბათობას. კერძოდ, მიდგომა ითვალისწინებს ერთი მხრივ, კვლევების რაოდენობრივი და ხარისხობრივი მნიშვნელოვნების შეფასებას, ხოლო მეორე მხრივ, შიდა ორგანიზაციული მართვის კუთხით არსებული და გარე წყაროების მიერ გამოვლენილი პრობლემების გათვალისწინებით კვლევის ეფექტიანობის ალბათობის შეფასებას. აღნიშნულ კომპონენტებზე დაყრდნობით, გაიანგარიშება მოსალოდნელი ეფექტიანობის ჯამური კოეფიციენტი, რომლის საფუძველზეც წინასწარ განსაზღვრული მატრიცის მიხედვით ხდება დასაგეგმი წლის განმავლობაში კონკრეტული კვლევის განხორციელების შესახებ გადაწყვეტილების მიღება (დეტალური ინფორმაციისათვის იხ. სრული დოკუმენტი).
ზემოაღნიშნული შიდა პოლიტიკის საფუძველზე იდენტიფიცირებული საკითხისა და არსებული რესურსების მიხედვით, განისაზღვრება კონკრეტული თემისათვის პუბლიკაციის მისაღები ტიპი (სერია). არსებული მდგომარეობით, პარლამენტის საბიუჯეტო ოფისის კვლევითი საქმიანობა მოიცავს სამ სერიას:
- კვლევითი პუბლიკაციები: აღნიშნული პუბლიკაციები, როგორც წესი, ასახავს კონკრეტული მაკროეკონომიკური/საბიუჯეტო საკითხის ემპირიულ შეფასებას.
- თემატური პუბლიკაციები: აღნიშნული პუბლიკაციები წარმოადგენს საკითხის შედარებით მოკლე ან მხოლოდ ცალკეული ასპექტის მიმოხილვას, შესაძლებელია ემპირიული შეფასების გარეშე, დაინტერესებულ მხარეთათვის მოკლე დროში საჭირო ინფორმაციის მისაწოდებლად.
- მეთოდოლოგიური განმარტებები: აღნიშნული განმარტებები მიზნად ისახავს კონკრეტული ტექნიკური კონცეფციის განმარტებას დაინტერესებულ მხარეთათვის.
